युवा, शिक्षित र उद्यमी नेतृत्वको दाबी: गोरखा–१ बाट मेरो उम्मेदवारी

आगामी २०८२ को निर्वाचनका लागि गोरखा–१ बाट युवा, शिक्षित र उद्यमी नेतृत्वका रूपमा मैले आफ्नो उम्मेदवारी दिने निर्णय गरेको छु। अनुभव, अध्ययन र अनुसन्धानमा आधारित जिम्मेवार राजनीतिमार्फत गोरखाको वास्तविक आवश्यकता सम्बोधन गर्ने मेरो प्रतिबद्धता हो।

आगामी २०८२ सालको निर्वाचनका लागि गोरखा निर्वाचन क्षेत्र नम्बर १ बाट मैले आफ्नो उम्मेदवारी दिने निर्णय गरेको छु। यो निर्णय कुनै अचानक लिइएको होइन । पछिल्लो एक दशकभन्दा बढी समयदेखि वैकल्पिक राजनीतिमा सक्रिय रहँदै मैले सिकेको अनुभव, अध्ययन र जिम्मेवारीको बोधबाट आएको निर्णय हो।

म देशका विभिन्न भू–भाग घुम्ने अवसर पाएको छु। तराईका अधिकांश जिल्ला, पहाडी क्षेत्रका धेरै जिल्ला र केही हिमाली जिल्लामा पुगेर त्यहाँका नागरिकको जीवन, समस्या र सम्भावना नजिकबाट बुझ्ने प्रयास गरेको छु। विशेषगरी गोरखा जिल्लाका अधिकांश भागमा पुगेर स्थानीय आवश्यकता, विकासका चुनौती र अवसरबारे प्रत्यक्ष रूपमा अध्ययन गरेको छु।

देशबाहिर पनि मैले विभिन्न मुलुक भ्रमण गर्ने अवसर पाएको छु। चीन, संयुक्त अरब इमिरेट्स (यूएई), सिंगापुर, भारत र भुटानलगायत विकसित तथा उदीयमान देशहरूमा पुगेर विकास मोडेल, पूर्वाधार, रोजगारी, पर्यटन र शासन प्रणालीबारे बुझ्ने मौका मिल्यो। साथै केही अफ्रिकी देशहरूको अनुभवले सीमित स्रोत हुँदाहुँदै पनि परिणाम निकाल्न सकिने उदाहरण देखाएको छ। यी सबै अनुभवलाई गोरखा–१ र नेपालको सन्दर्भमा व्यवहारिक रूपमा प्रयोग गर्न सकिन्छ भन्ने मेरो विश्वास छ।

शैक्षिक रूपमा म राजनीतिक शास्त्रमा स्नातकोत्तर अध्ययनरत छु। त्यसैले राजनीति भावनामा होइन, तथ्य, अध्ययन र अनुसन्धानमा आधारित हुनुपर्छ भन्ने मान्यता राख्छु। स्थानीय तहको वास्तविक आवश्यकता बुझेर तयार गरिएका कार्यक्रमहरूले मात्र दीर्घकालीन परिवर्तन सम्भव हुन्छ भन्ने मेरो धारणा हो।

राजनीतिसँगै म उद्यमशीलता र पर्यटन क्षेत्रमा पनि लामो समयदेखि सक्रिय छु। रोजगारी सिर्जना, युवालाई आफ्नै ठाउँमा अवसर दिनु, स्थानीय स्रोत र सीपको सदुपयोग गर्नु मेरो प्रमुख चासोका विषय हुन्। निजी क्षेत्रको अनुभवलाई सार्वजनिक नीतिसँग जोडेर परिणाम देखिने काम गर्न सकिन्छ भन्नेमा म विश्वस्त छु।

आगामी दिनहरूमा म गोरखा–१ का नागरिकसँग अझ नजिक भएर संवाद गर्नेछु, सुझाव लिनेछु र साझा एजेन्डा तयार गर्नेछु। राजनीति पदका लागि होइन, जिम्मेवारीका लागि हो भन्ने विश्वासका साथ म यो यात्रामा अघि बढेको छु। तपाईंहरूको साथ, सुझाव र भरोसाले मात्र यो प्रयास सफल हुन सक्छ।